2017 جىلدىڭ 31 قاڭتارداعى  مەملەكەت باسشىسى نۇرسۇلتان ءابىش ۇلىنىڭ قازاقستان حالقىنا ارناعان «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» جولداۋىنداعى ءتورتىنشى باسىمدىلىعى – ادام دەنساۋلىعىنىڭ  ساپاسىن جاقسارتۋ ماسەلە تۋرالى ايتقان ەدى. وسى ورايدا 2016-2019 جىلدارعا ارنالعان «دەنساۋلىق» مەملەكەتتىك باعدارلاماسى نەگىزىندە باتىس قازاقستان وبلىسىندا ءبىرقاتار يگى ىستەر ورىن الۋدا.  ايتا كەتسەك، وبلىستا  وتكەن جىلعا دەيىن 1600-دەن استام دارىگەر، التى مىڭعا جۋىق مەديسينا قىزمەتكەرلەرى ەڭبەك ەتىپ جۇرسە، وعان قوسىمشا تاعى 470 جاس دارىگەر كەلىپ، قىزمەتتەرىنە كىرىسكەن بولاتىن. تاۋەلسىزدىكتىڭ العاشقى جىلدارىندا دەنساۋلىق سالاسىن دامىتۋعا بيۋدجەتتەن 22 ميلليون تەڭگە بولىنگەن بولسا، بۇل كورسەتكىش وتكەن جىلى 27 ميلليارد تەڭگەگە، ال بيىل 39 ميلليارد  تەڭگەگە جەتكەن. باتىس قازاقستان وبلىسى سوڭعى ەكى جىلدا بويىنشا 25 مەديسينالىق مەكەمە كۇردەلى جوندەۋدەن ءوتىپ، بىلتىر 1 ميلليارد 600 ميلليون تەڭگەنى قۇرايتىن 140 مەديسينالىق تەحنيكا مەن جاڭادان 70 اۋتوكولىك قولدانىسقا بەرىلدى. سونداي-اق بارلىق قالالىق ەمحانالاردا ەلەكتروندى كەزەك جۇمىس جاسايدى. ساll-ورتالىعى دا حالىققا جۇيەلى قىزمەت ەتىپ كەلەدى. الداعى ۋاقىتتا بۇل جەتىستىك اۋدان ورتالىعىنا دە جەتەتىن بولادى. جىل سايىن وبلىس دارىگەرلەرى شەتەلدىڭ وزىق كلينيكالارىندا تاجىريبە الماسۋدا. حالىقتىڭ دەنساۋلىق ساقتاۋ مۇددەسىن الەۋمەتتىك قورعاۋ ءۇشىن ەلىمىز بويىنشا ارنايى ەنگىزىلە باستاعان مىندەتتى  الەۋمەتتىك مەديسينالىق ساقتاندىرۋ جۇيەسىن ءتۇسىندىرۋ جۇمىسى دا وڭىردە جۇيەلى جۇرگىزىلىپ كەلەدى.

-دامىعان ەلدەردىڭ كوبى مىندەتتى مەديسينالىق ساقتاندىرۋدىڭ ناتيجەسىن كورىپ وتىر. ءار ادام دەنساۋلىعى ءۇشىن ءوزى جاۋاپتى، دەگەنمەن مەملەكەت بۇل ماسەلەدە قاراپايىم حالىققا ۇتىمدى جانە جاقسى مۇمكىندىكتەردى جاساپ وتىر. مىندەتتى مەديسينالىق ساقتاندىرۋدى ەكىگە ءبولىپ قاراستىرار بولساق، ءبىرىنشىسى – نەگىزگى ساقتاندىرۋ ءتۇرى. بۇعان مەملەكەتتىك بيۋدجەتتەن تەگىن كورسەتىلەتىن مەديسينالىق قىزمەتتەر كىرەدى. ول ەلىمىزدىڭ بارلىق ازاماتتارىنا قولجەتىمدى. بۇل قىزمەت ءتۇرى «جەدەل جاردەم»، سانيتارلىق اۆياسيا، الەۋمەتتىك اۋرۋلاردى ەمدەۋ جانە توتەنشە جاعدايلاردا، پروفيلاكتيكالىق ەكپە كەزىندە كورسەتىلەدى. ەكىنشىسى، مەديسينالىق ساقتاندىرۋ قورى ۇسىناتىن مىندەتتى الەۋمەتتىك ساقتاندىرۋ  پاكەتى. بۇعان امبۋلاتوريالىق-ەمحانالىق، ستاسيونارلىق  كومەك،  قالپىنا كەلتىرۋ ەمدىك شارالارى، مەديسينالىق رەابيلليتاسيا جانە جوعارى تەحنولوگيالىق كومەك كىرەدى. سونداي-اق الەۋمەتتىك مەديسينالىق ساقتاندىرۋ جارناسىن تولەۋدەن ازاماتتاردىڭ 15 ساناتى بوساتىلادى، ولاردىڭ دەنى حالىقتىڭ الەۋمەتتىك تۇرعىداعى وسال توبى. قور مەديسينالىق ۇيىمداردى ىرىكتەيدى جانە قىزمەت ساپاسىن قاداعالايدى. سوندىقتان ءار كلينيكا ساپالى قىزمەت كورسەتۋگە تىرىسادى جانە باسەكەنىڭ ارتۋىنا سەپتىگىن تيگىزەدى. وڭىردە مىندەتتى الەۋمەتتىك مەديسينالىق ساقتاندىرۋدى  تۇرعىندارعا تۇسىندىرۋدە دەنساۋلىق سالاسىنىڭ قىزمەتكەرلەرى قارقىندى ۇلەس قوسۋدا،- دەدى باتىس قازاقستان وبلىستىق دەنساۋلىق ساقتاۋ باسقارما باسشىسىنىڭ ورىنباسارى نۇردانات بەركىنعالي.                                                  

گۇلسەزىم ەربولات،

باتىس قازاقستان وبلىسى